鄭秀文(Sammi)當年參加新秀歌唱比賽嗰時，畀人一種圓圓有肉地嘅感覺，但到咗0依家Sammi經歷咗咁多年嘅努力，身型靚到可以喺演唱會到大騷畀人睇。

早前Sammi喺商台節目接受訪問嘅時候，就話嚟緊有意推出一本關於減肥嘅書，佢話：「呢本書構思咗四年，仲諗埋書名《不是做一個最瘦的自己，是要做一個最好的自己》，我以前有啲減肥方法都好攞膽，好似食藥、每日只係食一個蘋果，餓到暈都繼續做運動，但我全部都會寫，等大家自行選擇。我希望大家了解通過減肥、運動同均衡飲食，搵到最好嘅自己。」

同樣係歌星同演員身份嘅Sammi近年都已經絕跡音樂頒獎禮，佢坦言0依家呢個階段熱衷出席電影頒獎禮多過樂壇頒獎禮，佢話：「我認為自己喺電影方面未去到最盛開嘅階段，所以仍然要獎項去支持。」講到要用獎項去支持自己，今年嘅金像獎對佢嚟講都算係打咗枝強心針先，因為話得佢有機會撼章子怡爭影后，佢就好謙咁話：「我係預咗輸，如果到時入圍，我會著得靚啲志在參與。」