【新增內容】

民建聯去年就九龍西補選進行內部遴選，深水埗區議員鄭泳舜代表該黨出戰，噚日立法會補選，今日凌晨陸續開始點票，最終鄭泳舜以逾2,000票擊敗姚松炎，由商二代保良局前主席鄭錦鐘公子、即係胡杏兒姐夫鄭泳舜當選。

對於姐夫鄭泳舜當選，《蘋果》今日問到胡杏兒，佢只係短訊回覆：「Thank You!」

而姐夫鄭泳舜當選後，感謝義工團隊同建制派議員不眠不休咁支持，佢指希望社會聚焦民生、減少內耗，進入議會後會就九龍西民生議題發表意見，並承諾會務實議政，理性處理問題。

其實2012年胡杏兒姐夫鄭泳舜做立法會九龍西民建聯候選人，胡杏兒都有幫手拉票，呢招「明星效應」，今年1月亦有用，鄭泳舜獲港九潮州公會邀請，同「Chef Le Mon」謝霆鋒去北河同行，與「深水埗明哥」陳灼明一齊派飯，其後鄭泳舜喺fb貼出合照。鄭泳舜話透過公會認識霆鋒，知霆鋒好關心深水埗民生同埋飲食文化，所以先邀請佢一齊幫手。

對於鄭泳舜當選，《蘋果》今日問霆鋒，佢透過經理人霍汶希回應：「霆鋒話嚟過《鋒味》嘅人都好旺、好紅喎。」

立會補選新聞，《蘋果》一網睇晒
http://bit.ly/appledaily311

精選娛聞，喺晒《娛果》
http://fb.com/appledailyent