禮拜六澳職獨腳戲，上屆常規賽冠軍FC悉尼靠以前踢英超時代雷丁嘅英格蘭射手方祖入兩粒，主場2:1險勝尾段有首席射手阿當泰加特射失12碼嘅布里斯班獅吼，驚險拎到今季首個三連捷，而獅吼就陰公啲，就算炒咗前教練艾萊斯，都係要五連敗。

悉尼今季戰績冇之前咁好，好大原因係上屆神射手保保走咗，球會今季換嚟32歲嘅前雷丁射手方祖，卡士牌面就高過保保，踢落都相當對辦，今屆只係得3場澳職冇波入，而佢今場先喺16分鐘接應中場米高蘇路左路嘅45度角傳中，方祖就喺12碼點附近搶點頂贏，獅吼龍門占美楊格企位就太出，就咁俾方祖笠死。去到35分鐘，獅吼就靠中場麥特麥基射入今屆個人第一球追平。

不過，方祖55分鐘再接應班頓奧尼爾左路地波傳中，又喺12碼點附近左腳巧妙咁撞射地波，忍住道力就攞遠柱死角，占美楊格就只能夠望住個波碌入，方祖拎到佢第9個聯賽入球，繼續喺射手榜帶頭。完場前8分鐘，獅吼有阿當泰加特俾人勾腳尾博到12碼，不過佢自己主射地波就俾門將列美尼救出，就咁悉尼險勝2:1拎晒三分。獅吼雖然五連敗，不過今場成班波都明顯有起色咗，起碼好過對上兩周加埋輸足八粒咁誇張，不過捧悉尼嘅上盤客就慘啲，最後落飛到讓一球/球半，而家就贏波輸盤。

--------------------
BFB CHAMPIONS 2.0 陪你過聖誕！登入即送應節聖誕鹿球員！累積連續登入可得 ★7保底球探券同免費10抽機會！
http://bit.ly/2xrTKGM
--------------------
《體蘋果》陪你睇波講波
https://www.fb.com/appledailysports