當年今日

【對官司平常心】葉家寶問心無愧 冇虧待員工:我都係打工仔

蘋果日報 2015/09/30 06:00

蘋果香港官司葉家寶打工仔即時問心無愧平常心

亞視執行董事葉家寶今日喺銅鑼灣接受黃夏蕙經理人訪問,原來噚日葉家寶生日,問佢今年幾歲生日?佢笑言叫記者估下,佢話噚晚同家人慶祝,都好開心,因為有好多外國親友都返咗嚟,佢哋好支持佢,知佢十月二日要上法庭,收到好多朋友短訊,除咗講生日快樂,都係希望佢官司順利解決。

今日訪問內容,主要係講返佢之前人生經歷奮鬥史,藉以激勵年輕人,家寶話過去一年真係好難忘,全心全力為公司員工,希望保住七百幾人飯碗,又背負住勞工處畀傳票佢,過去一年真係經歷好多,嚟緊星期五要上庭,要去足五日,呢段時間都幾難忘。

家寶又謂今日喺blog寫咗三篇感想,由公司欠薪風波開始,分三個時段講,第一個時段講欠薪,第二個時段遇到官司,即係小股東告大股東件事,第三就係48小時內,要搵到足夠薪金出糧嗰段時間,即係3月31日至4月1日個段時間,經歷好多嘢,中間好多嘢外界冇人知,所以講囉,之後10月2日上庭就唔會再提。

問佢對官司有冇信心?家寶表示以平常心面對,自己冇虧待公司員工,亦問心無愧:「我都係打工仔,當時都有被欠薪,0依家所有欠薪都告一段落,薪金及利息畀晒,員工都睇到,有新投資者。」

再問到加咗人工後,員工士氣點?佢話:「噚日宣布咗有七八成員工有得加人工,其實亞視員工有一段時間冇加人工,普遍同其他公司加人工幅度脫節,總之大家檢討員工薪酬,將來可能有獎賞及花紅,士氣方面大家都雀躍,希望新投資者着重員工薪酬。」

咁有啲藝員完約後,會否再陸續傾返?佢再話:「評估製作方面,之後好多條頻道嘛,睇返適合員工會傾返,嚟緊想重拍經典劇集,有啲版權之前賣咗,可能傾返合作,或者買返版權返嚟。」