韓國Channel A人氣節目《Heart Signal》早前被騰訊購買版權，開拍中國版。喺韓國方面《Heart Signal》今年3月播出第二季，節目安排幾位年輕男女喺一間寓所內同居一個月，係一個戀愛推理嘅節目，參賽者會透過唔同signal去表達喜歡之情，並於同居最後一日向心儀對象告白。

雖然第二季已播畢，但近日節目嘅出演者卻疑似捲入糾紛， 噚日有示威者就喺一名出演者嘅餐廳門外進行示威，指對方向女性敲詐金錢，又指對方涉盜竊女方嘅名牌手袋及現金等等。由於喺第二季中出演者金賢佑就係日式家庭料理店《Mesiya》嘅老闆兼廚師，所以一眾網民都猜測當事人正正係金賢佑。

而根據韓媒報道，金賢佑方面接受傳媒訪問，強調金賢佑冇騙取金錢，又指金賢佑5年前曾經同女方短暫地交往，但最後卻遭到對方威脅，同時又提及日前有一名男子到餐廳要求金賢佑還2千韓圜，並威脅會損壞店舖，又向經理展示轉賬證明指金賢佑向佢哋借咗820萬本金，現時連利息就需要還2千萬韓圜(約14萬港元)云云，金賢佑方面表示：「因為上過電視，就將尚未確認嘅事實見報，令人十分痛苦。」由於考慮到難以繼續營業，所以現時餐廳就暫時休業。

金賢佑方面指會針對威脅、恐嚇、毀損名譽以及妨礙營業等問題所造成嘅損失以及精神傷害，預計將會提出刑事訴訟。

更多韓流，喺晒《娛果》
http://fb.com/appledailyent