原來，噚日第三場賽事以馬會前主席兼匯豐前大班浦偉士（Sir William Purves）命名。Rose喺銀行界打滾幾十年，佢曾經提過係匯豐工作嗰30多年間遇過唔少恩師，其中不得不提就係俾佢好多發揮機會嘅浦偉士，唔怪得Rose姐要特登出山頒發浦偉士碟啦。
講番香港馬圈同匯豐真係好有淵源，除咗浦偉士，另一位匯豐前大班沈弼（Michael Sandberg）都出任過馬會主席，唔怪得九七前人人都識講香港係由馬會、匯豐同港督管治。
至於匯豐另一位女大班、恒生前前一姐梁高美懿，更加係資深馬主，過去十幾年同老公分別以唔同名義持有過十幾匹馬，包括現役馬「勁威神童」，相信梁太退休後都會係馬場常客。