【智取大市】新經濟超前投資模式（晉佳）
蘋果日報 2020/06/07 17:16
晉佳智取大市
美國航空兩日升逾1倍，由龍頭炒到龍尾，晉佳指升市循環近完結。
無論政局點混亂，各種科技應用喺未來日子陸續爆發，只係遲早問題。武肺引導環球狂印鈔，連美國都大有機會走到負利率之下，龐大資金似乎更超前炒定新經濟股成果。
當肉眼睇到5G、AI嘅應用成果，受惠股各自老早炒到高位，例如美股多隻cloud security股全線狂炒，收入有限兼虧損之下已炒到100億、200億美金市值，問題係他朝冇可能隻隻係皇者，到時能夠坐大嘅就保持喺高位，被踢出局者自然遭拋售。如果等到睇到新經濟成果以至辦別到贏家先買，基本上已冇乜水位，任何潛力板塊都會超前炒定。
武肺令投資方式產生改變，要想像5G、AI嘅應用潮流方向，考慮企業能否真實成功反而次要，趁強勢初形成順勢買入，只要賬面獲利就一直滾落去，去到股價停滯再獲利換去下一批潛力科技應用板塊。之前講智能家居係AI場景應用門檻偏低嘅板塊，之前提過可先留意機會。資金氾濫而對新經濟渴求嘅環境下，如何避開股市波動已經係次要考慮，要贏最大嗰浸，要學識超前買入。
武肺疫情令多國大量印鈔減息放手一搏，喺股市反彈過程中，美股由FANGMAN炒到三線新經濟股，然後炒到疫情受累股，美國航空AAL可以兩日一度升超過1倍，由龍頭炒到龍尾，事實上亦由強勢美股炒到弱勢港股，升市循環近完結，持大路股份理應獲利再等機會。
晉佳
https://www.facebook.com/advanceguy1