入行30年值得紀念，噚晚李克勤舉行咗頭場演唱會，唱到晚上11點半先完騷。

克勤之後喺後台訪問講番感受，佢大呼一口氣：「鬆一口氣，大步檻過，噚晚5點幾先返到酒店，未曾試過冇full dress綵排就上台。」原來佢噚晚12點幾開始等，但個舞台都未得，克勤話呢啲事好似飛機delay咁，冇得解釋。

雖然遲咗，但克勤讚團隊準備充足，好似encore同《深深深》嗰part長medley都冇綵排過。克勤話最擔心其實係第一part，因為好多機關，事前只係試過兩次威吔，仲擔心到唔係好瞓到覺。

至於喺台底彈上嚟一幕，佢都只係練咗三次，正式表現呢次彈得最高，臨場仲有好多紙碎，台面比較跣，佢話聽日校一校個台就會好啲。克勤喺台上仲有件睡袍戰衣，充滿Wyman Style。

克勤又話好多謝Sammi做嘉賓，大膽喺螢幕展示咀嘴相，克勤話：「我真係唔知，不過頭先佢（太太）喺後台攬一攬我，同我講good show，即係冇事啦。」佢仲話一對囝囝今晚冇嚟，可能會喺星期五、六、日俾啲山頂位佢哋坐。