【2017大事回顧】
每一年總有啲人同事特別難忘；今年亦有唔少物品，被重新賦予意義：如果冇「佢」，白襪仔未必有咁脫俗嘅感覺；如果冇「佢」，黑絲同旗袍似乎勢不兩立；又若然冇咗「佢」，可能食薯片而不知何味。講到病假，大家諗起西餅；一地兩檢，就會聯想釘書釘，2017年嘅香港，令人會心微笑，定係更為令人發笑？

黑絲　包唔住少女心

本來呢，黑絲真係冇乜特別，最多大家諗起江美儀（唔會係蓋鳴暉啩?!），但今年黑絲呢樣貼身物品嘅身價，就因為香港首位女特首林鄭月娥變得更矜貴。
咪以為八方搞錯，乜林鄭唔係旗袍控，着旗袍多過着正裝，佢都話過有多過20套旗袍啦。數量多，又如何？似乎都唔及佢突然換上黑絲，配個小手袋仔換上少女味咁令人記憶猶新喎！
事緣7月底嘅《建軍大業》首映禮，林鄭一身紅噹噹透視喱士連身裙、襯咗黑色小手袋同黑絲登場（圖），據知在場人士見黑絲林鄭步近亦「眼前一亮」，估唔到佢睇戲竟然會大變身，仲創新地走少女風？
最搞笑係呢對黑絲有「前傳」，林鄭當選特首後冇耐，就俾讀者發現佢同老公去ifc睇戲後shopping，其間仲去咗掃黑絲，點估得到係喺登位後隆重登場？而呢對黑絲亦話畀大家聽，只要肯嘗試，凡事都有可能，禮賓府都可以係女人話事！

李八方