傳統泰菜口味濃郁香口，全因泰國天氣熱，香濃的口味比較惹味，令人食慾大振，但相對有不少人會嫌太濃太膩。最近有泰菜館十分「識撈」，為泰菜注入春夏清淡的感覺，令傳統口味加入不少新意。

記者：張一豪
攝影：王文忠

取泰中之長西式煮法

「泰軒」總廚LiamsrijoanBunhiang留港超過8年，能操一口流利廣東話，平日四出搵食，所以知道香港人口味，最近創出多款充滿春夏氣息的新鮮泰菜，一反傳統泰菜味濃的印象。「我泰南出身喜歡食辣，但泰國中部菜式味道較溫和，配各款清淡醒胃嘅泰式香料同醬汁，部份再混合西式煮法，咁應該食起嚟唔會膩，香港人會好接受。」
Bunhiang新創首本名菜「香芒果絲炸魚鬆」，靈感源自傳統泰菜炸魚鬆塊，將新鮮烏頭魚起肉後蒸熟，剁碎成魚鬆後混入麵包糠炸至色澤金黃。本來淨吃魚鬆餅會比較膩，但與泰國青芒絲、洋葱、泰椒、椰糖漿及魚露等配料撈在一起伴吃，香辣醒胃又清新，難怪「泰軒」最近被本地飲食網站選為「最優秀灣仔開飯熱店」。

炸麵卷大蝦$78

用泰國香米製成布吉麵，布吉麵是當地傳統民間食品，麵身較幼細，捲上鮮蝦去炸，令外層香脆，同時保持蝦肉的爽口，皮脆肉鮮伴沙律醬或泰式雞醬，酸甜開胃。

馳名麵包蟹　$258

招牌菜，特別訂製的麵包，裝着以秘製咖喱去煮的上等泰國青蟹，全個菜內外皆可吃，尤其焗香了的麵包再配咖喱汁同吃，比蟹更加惹味，越食越想食。

酸辣三文魚沙律$88

以新鮮挪威三文魚刺身切粒，配以用香茅碎、青檸汁、薄荷葉等香料配製的自創醬汁，再混入烘焙後磨成幼沙狀的泰國香米，入口酸辣，有層次感，是款很特別的三文魚新吃法。

泰式荷葉包飯　$58

中式荷葉跟泰式炒飯的新鮮配搭。炒飯是以泰國香米加入蓮子菇、雞髀菇、馬蹄肉、腰果等同炒，再包荷葉焗透，飯味帶荷葉香，配料口感豐富，而且無用肉類配料，適合素食者。

泰軒（28777983）
地址：灣仔駱克道117號A地舖

連印度人都鍾意

如果是觀塘街坊，一定認識日日好像筵開百席的新南苑小菜館，最近殺出觀塘，不做老本行卻玩泰菜。負責人阿二找到曾在灣仔新曼谷做過的清邁廚師，他的「噴令」咖喱相當獨特，加入很多花生去煮，味道如沙嗲與咖喱之間，加上新南苑是中菜出身，所以部份菜式加入中菜做法，有鑊氣又有泰菜惹味，用來佐酒最好不過，最有趣採訪當日遇到印度人熟客，更大讚好味，連印度人都吸引去食的泰菜，真寫個服字。

皇宮大頭蝦$88

以師傅獨門秘製的咖喱汁，配泰國來的淡水大頭蝦，蝦肉本身比較淡，但肉爽，配上汁醬加添鮮味。

噴令煙鴨胸$48

特製的噴令咖喱，加上啖啖肉的煙鴨胸，帶沙嗲風味的咖喱，令這味菜有串燒般的風味。

芒果牛柳粒$58

看似是中式小炒，但吃下去才知是用了泰式調味，帶香辣和甜，牛肉醃得鬆軟有肉味，入口不韌。

新南苑泰國菜館（23822252）
地址：九龍城龍崗道35號地下

食客有say

Zero：「泰軒的泰菜好清，尤其個荷葉飯，唔會好heavy，啱晒女仔食。」

Ivan：「泰軒啲嘢幾好呀，我有時都鍾意自己一個人嚟，個炸麵卷大蝦我欣賞。」

阿B星：「新南苑開張到𠵱家幫襯超過20次，變成飯堂，菜式平靚正。」