一心要喺四年任內大有作為嘅葉劉,單靠個人力量又點同政府揮?佢最近請咗四個議員助理一齊打江山,無獨有偶四位助理都係年輕男士,而且學歷都唔錯,被葉劉封為四大天王。呢個配搭可能令人覺得葉劉重男輕女,但八方聽聞同葉劉應徵嘅人士中,都係以男性居多;有個條件唔錯嘅女仔本來都獲葉劉睇中,可惜最終冇去面試,造就咗四大猛男檔嘅誕生。好彩葉劉最近參加咗中大嘅師生計劃,有個一年級靚女學生做佢實習生,戥勻一下佢個陽盛陰衰班底。
原來喺葉劉參選立法會前,中國發改委已經邀請佢加入成為理事,最近終於成事,葉劉已經被委任為發改委旗下中國改革理事會嘅副理事,一年要至少上京開會一次,同中央距離又接近一啲。