劉心悠今日一身紅色聖誕Look現身尖沙嘴，出席商場嘅聖誕佈置活動，仲即場示範DIY聖誕裝飾，剪咗一頭短髮嘅心悠受訪時表示因為近來拍緊新劇：「角色需要短頭髮，導演話想要我個角色比較強同男仔頭啲，所以建議我剪短頭髮。」入行多年一直保持著長髮形象嘅心悠話：「第一次剪短頭髮，感覺好得意。」咁有無唔捨得剪嘅感覺？佢話：「咁又冇喎，橫掂頭髮可以生番長，而且依家每朝整頭好方便，好快就整好，好清爽。」

講到而家拍緊嘅新劇，佢話：「同苗僑偉、黃宗澤合作，喺劇入面我哋飾演保險調查員，調查所有保險賠償嘅事，早前先去完捷克布拉格拍外景，依家就喺深圳拍，嚟緊遲啲仲要去馬來西亞。」心悠話劇集預計明年一月先拍完，所以成個聖誕假期都要喺工作中渡過。講到第一次同兩位合作，心悠話：「佢哋好高大，好有型，我記得早幾日影poster嘅時候，佢哋兩個企喺我側邊顯得我好似細路女咁。」