眨下眼《狂野時速》嚟到第八集，上一集全球票房勁收超過15億美元，大家都想知今次會唔會再有驚喜俾到大家，《蘋果動新聞》早前到北京訪問金像影后查理絲泰朗（Charlize Theron） 、英國型男積遜史迪咸 （Jason Statham）。據知今集一如以往有大量靚車，仲會出動埋坦克、潛艇、軍用飛機 ，好多人都想知今集佢哋又報銷咗幾多真車？系列御用監製Neal Moritz就話係125部！戲中車隊都會有新成員加入，有傳角色將會取代過咗身嘅保羅獲加（Paul Walker），導演同監製亦會向我哋回應呢個傳聞。

積遜史迪咸 （Jason Statham）今次會由奸變忠，佢解釋：「不是完全加入他們 ，跟他們一起工作是為了得到我想要的。」上集佢同雲狄素（Vin Diesel）凌空格鬥已經夠誇張，今集就會同狄維莊遜（Dwayne Johnson）嚟個監獄混戰，提起The Rock時積遜顯得相當興奮，「越獄那場戲，對！我愛那場越獄戲！狄維莊是一個很好的對手，因為他會令過程很緊湊，那場戲是我想逃走，他卻想抓我，我要極力地避開他，是一個挺有趣的互動。」另外有場戲抱住個ＢＢ打壞人非常搶鏡，不過積遜希望留返驚喜畀入場觀眾，「我是邊打邊保護他，那是一個保密的一幕，但出來的結果真的很好。」

作為呢個系列第一個女奸角，查理絲角色係住係飛機上嘅高科技恐怖份子 ，拍《狂野時速》但竟然冇得飛車 ，會唔會覺得好可惜？「這是個很明智決定，她遠在天空可以在飛機做壞事，我喜歡這種像捕獵者的感覺，這樣看起來會更加強大。但個人來說，我是很想駕車的！」既然戲中冇得飛車，如果要佢坐一個主角嘅順風車的話，佢會揀邊個？「雪洛迪古絲， Letty(角色名)！ 她是那麼的強悍，令人想像不到的，我坐她車一起去哪裏都可以。」

名導奇連伊士活（Clint Eastwood）個仔Scott Eastwood都會加盟佢哋戲中車隊，佢個角色同當年保羅獲加一樣都係警察。有傳佢個角色係取代保羅獲加，導演加利格雷（Gary Gray）回應：「我們沒有打算用任何一個角色去取代他，史葛的角色是一定要跟規矩做事的人 ，很死板的，保羅的角色很開明。今次我們用另一方式去追悼保 羅，那是一個驚喜，你去看電影就會明白的了。」

《狂野時速6》劇情都提及過香港，但當時實際只係喺倫敦拍攝冇嚟香港取景。而今集拍攝場地有古巴、俄羅斯、冰島同紐約，始終都係冇之前傳嘅香港，問到佢哋幾時會嚟香港拍場賽車戲？監製Neal講笑咁話其實一直都有諗可唔可以來港拍《狂野》，仲問記者可唔可以幫佢哋手清場。

記者：黃芷蔚