因為家人，謝邱安儀（Annie）當上謝瑞麟主席兼行政總裁，一做過十年，去年更多一份「兼職」，出任香港零售管理協會主席。「我已經忙咗好多年喇......」想起擱置已久的小提琴，她坦言「好想好想學返」。要有時間重拾嗜好，先要找到合適的繼任人，育有兩女一子的Annie直言渴求子女接手生意，兒女還小已急不及待滲透生意經，「希望佢會入到腦」。

「其實我啲嗜好已經放低咗好多年喇......」從小喜愛音樂的Annie，很喜歡拉小提琴，「好耐好耐冇奢侈嘅時間重拾自己嘅嗜好」，她形容琴技早已「生銹」，回想最後一次拉琴，已是一年多前的事——公司於馬來西亞舉辦品牌活動，Annie邀請了一個小型管弦樂團在活動序幕中演奏——觀眾席前排位置不見其身影，原來她當上指揮！「（樂隊同我）只係夾咗半日左右時間，但整個過程好開心」，「其實真係好想好想學返，好想好想拉返」。

多年來忙於事業的Annie，坦言渴望仔女早日加入集團學習，將來繼承家族生意。大女21歲、二女19歲、細仔15歲，當然先向大女兒「埋手」。「以前佢哋仲係任我擺佈嘅時候呢，我會帶埋佢哋一齊巡舖，我就對住我大囡講，教佢咩叫做gp（gross profit，毛利）、乜嘢叫做生意額，希望佢會入到腦」，說罷她也笑不攏嘴。

現在大囡已美國畢業回港，修讀生物化學的她有志繼續進修；在港讀書的兒子則醉心運動，似乎與珠寶不靠攏；學科與珠寶較為接近的只有讀藝術出身的細囡，「珠寶同藝術都係好近好近架嘛，希望喺嗰方面都幫到手啦」。不過，正如Annie所言，在學時期最重要學會解難技巧，培養思考方式，將來的事業路，還得看際遇。

記者：邱曉欣
攝影：鄒潔珊

investMAN
For People of Style & Substance
掌握理財智慧 感受生活品味
http://facebook.com/investMAN.hk