「夾band唔係潦倒！」、「啲人覺得香港樂隊搵唔到食，咁就好慘，更加冇人入行！」、「香港父母特別喜歡俾小朋友學樂器，但目的係考間好學校，冇令小朋友enjoy音樂！」－－獨立樂隊ToNick誓要幫香港人洗腦，希望可以態度改變命運！

成軍10年嘅ToNick，今年憑電影《救殭清道夫》主題曲《長相廝守》彈起，MV喺YouTube有逾340萬點擊，主音恆仔、結他手小龜、低音結他手Ryan、鼓手晨曦讀大學時喺音樂會社認識，志同道合開始夾band。

冇聽開ToNick嘅人，會將樂隊名讀錯To Nick，但原來應該讀「湯力（譯音）」，恆仔話：「Tonic係音樂裏面好重要元素－－Do音，Nick係解刻畫一啲嘢，加埋係我哋想用音樂去刻畫人生。」《長相廝守》熱播，譚嘉儀、許靖允、譚杏藍同大班網友都喺YouTube翻唱，恆仔開心話：「希望香港多啲人玩音樂。」

好多人覺得獨立樂隊喺香港搵唔到食，到底ToNick點睇呢？

小龜話：「喺香港生活本身已經好困難，大家都知租貴，衣食住行通脹快；但只要你鍾意就唔會覺得辛苦。我哋對香港音樂冇怨言，當年我都瞓過band房，係辛酸史定青春回憶？我哋最唔喜歡，啲人覺得香港樂隊搵唔到食，好慘！」晨曦慨嘆：「咁就好慘，更加冇人入行。」

恆仔表示其實做音樂有好多範疇：「散播呢啲訊息更加弊傢伙，其實做音樂好多範疇，作歌、配樂、教音樂，如果灌輸畀父母同小朋友知，音樂等於潦倒，咁咪冇人學音樂囉。」小龜又講到香港小朋友學樂器嘅現象：「我想改變一樣嘢，香港父母特別喜歡畀小朋友學樂器，但目的係考間好嘅學校，佢哋冇令小朋友enjoy音樂，我從來冇見過玩音樂嘅人老得快，所以覺得香港要畀正面訊息，夾band唔係咁慘！」

咁ToNick四子有冇面對過經濟問題？恆仔坦言：「我哋個個踩住兩份工，但都係同音樂有關，當樂隊係專業，但同時要顧生計。」晨曦覺得態度可以改變命運：「之前喺搭出嘅嚟地方做band房，我唔覺得潦倒，呢個係態度改變命運。喺香港正如父母講，有手有腳唔會餓死，我哋對失敗界線好低，只要有地方夾band已經好好。」

攝影：仇志德
化妝：Candice Li