改編人氣網絡漫畫、由人氣男團EXO嘅27歲隊長Suho及韓片《哭聲》童星金歡熙主演嘅電影《初中女生A的虛擬樂園》，今年6月喺韓國上映引起關注，電影已於前日喺香港開畫。

Suho日前就受訪大談片中角色，佢話雖然佢個角色外表睇起來好似好愉快，但其實內心就唔係，佢話：「有些原因以致表裡不一、心情好複雜嘅人物，角色內心係非常特別，展現出許多四次元行為嘅花美男少年。」Suho話雖然《初中女生A的虛擬樂園》這部電影係講中學生嘅故事，但係就唔係只適合10多歲嘅觀眾，就算係20多歲或30幾歲，甚至任何年齡階層人士都適合觀看，觀眾亦可從中得到共鳴。

Suho表示參與呢部電影係希望通過電影傳達作品嘅訊息，佢話：「唔只係同朋友，亦可以同爸爸媽媽、，嫲嫲爺爺，一家大細一齊欣賞，從而希望大家接收到當中嘅訊息。」

《初中女生A的虛擬樂園》講述沉迷遊戲嘅中學生美萊(金歡熙飾)逐漸接觸社會，學習成長同與人相處嘅故事。故事中，美萊之所以會沉迷遊戲，係因為遊戲中冇虐待佢嘅父親、唔需要返學、唔係獨自一人，完全係美萊嘅理想生活。不過突然有一日，美萊嘗試結交人生中第一個朋友，卻因突如其來嘅意外令佢受到傷害，美萊就變得比之前更畏縮。而Suho飾演嘅角色有着四次元嘅性格，但同時亦背負住不為人知嘅過去，佢同美萊之間會發生咩事呢？

精選韓流，喺晒《娛果》
http://fb.com/appledailyent