御華陽是其中一個獲蘋果基金「送暖行動」資助的社會服務團體，該團體獲撥款五千元購買頸巾、冷帽、手套及厚襪，共有二百名長者受惠。
「我最喜歡呢條頸巾，事關我氣管收窄，成日氣喘，最怕就係冷親條頸，所以呢條頸巾好啱我用。」梁文英婆婆如獲至寶地說。
冬日禮包實用
八十二歲的梁婆婆，患有哮喘病多年，常因氣管收縮引致呼吸困難，經常出入醫院，亦要長期依靠噴霧藥物控制病情。「冇辦法，人老咗身體實係差啲，早排先住咗個幾月醫院，所以平日都要好小心。」
三年前喪偶的梁婆婆，現居於安老院，經濟上依靠兒子及生果金維持。惟梁婆婆慨歎，整體社會經濟環境欠佳，加上兒子本身亦有家室，為了減輕家人的負擔，她平日也克盡節儉，不敢亂花一分一毫。「自己得一粒仔，乜都靠佢，淨係老人院每個月都要交一千四百幾蚊住宿費，個仔都好重皮，我梗係要慳住使啦！」是次獲贈冬日禮品包，梁婆婆大表實用，並笑言可為她減省不少開支。
另一受惠長者孫霞婆婆，同樣對冬日禮品包愛不釋手。「我最鍾意頂冷帽，啲顏色紫紫紅紅，好靚。」孫婆婆說着說着，已急不及待拿起冷帽試戴。八十七歲的孫婆婆，年老體衰，一年之中她最害怕冬季，即使訪問當天氣溫20℃，但她已穿上一身厚厚的衣服。她說：「我好怕凍㗎，𠵱家我都着咗六件衫，老人家穩陣啲好，病咗就麻煩。」