翁靜晶接受本報電話訪問時，仲搵埋當日負責代佢將解碼器親自「人肉」到有線嘅司機叔叔林先生受訪，林先生憶述謂:「佢(有線)話OK咗0架喇，當面應承我話OK，後期嗰面居然又反口喇，話唔得喎，你要預早一個月通知喎，又點又點，最後又冇咗件事喇。」跟住再致電有線，話已經搵人親身送番個解碼器返嚟喇喎……但有線方面都係話:「唔係喎，你交還解碼器，要一個月前通知。」

林先生話，其實翁靜晶方面早於兩個月前搵同事通知有線話要cut，比有線要求嘅一個月通知仲多咗一個月，咁交還埋個解碼器咪就了咗件事囉，點知有線話唔得:「佢話交還解碼器要一個月先至生效，又賴貓。完全講嘅嘢都唔算數，好得人驚。」

林先生再謂：「我肯定唔會再申請，百分之一百唔會再申請。我肯定。貼錢仲要好難先搵人請得走佢哋，你邊度有人夠膽黐埋有線度呢﹑又唔係冇得選擇依家。」佢話有線sales試過上門推銷，當時林先生就熄咗部電視先，再同個sales講:「我唔使錢嘅電視我都唔睇，我情願熄咗佢，我點會睇你哋有線電視？」最後個sales走咗。

大家又試下呢招work唔work啦。