八變七 豪升級
八變七,講嘅係座位數目。本身係八人車嘅Stepwgn,最新小改款將中排座位三改二!咁咪載少個?唔使激動,因為換嚟嘅係乘坐質素大提升,兩張豪華大班椅加車中間一條長走廊,而一貫嘅慳油、實用,又靈活性十足嘅優點一律保留,抵讚啦!
記者:梁美甜
攝影:王文忠
模特兒:Tiffany(TheGroup)
油價飆升牽連到樣樣都話要加價,啲錢貶值唔見使,認真慘情,咁嘅環境下,環保車款自然大有優勢。所以新小改款七人車Stepwgn,校準時機登場。Stepwgn當年一推出市場就已經大熱,事關部車慳油又環保,既可得到政府環保車減稅優惠,更可以慳番唔少油費,最正仲係中價車,但設備齊全又高度實用,外形亦絕唔古板老土,啱Trend兼好用,點會唔Hit。至於最新小改款其實並無乜大變動或修飾,最主要係將中排三座改成兩張獨立大班椅,即係由八人車變身成七人車。大大張椅豪華得嚟又真係幾舒服,若然裝埋Massage就更完美㖭喇!係就係坐少咗人,但邊得嚟人人都係大家庭要足八座呢?新車除了載人量減少外,基本上車廂陳設跟舊版大致相若,亦可以因應需要而變出所需載物空間,實用率依然高企。
外形上,只係喺車頭泵把位作出少改動,霧燈旁加上兩個小燈,令整體感覺更有動感同活力。車廂設備依然有三天窗、中控置有輕觸式彩芒連ParkingCamera,要掌控全車系統裝置簡單又容易。新車沿用高級音響系統,車廠有見近年好多汽車音響都無聲無息地被人偷走,於是特設汽車音響防盜系統,音響離開車身就自動鎖上,就算真係被人偷走都無用!
動力方面,依然係2.0公升環保i-VTEC引擎,輸出155匹馬力及19.2kgm扭力,唔可以話好勁,但操控容易,行車穩定,日常出入就一定夠。大家可能會話七人豪華車大把,Stepwgn八座變七座好巴閉咩?係,七人豪華車確唔少,不過講到價錢,呢部新版Stepwgn應該嗒得杯落。
■新車依然沿用環保i-VTEC引擎,可以減稅又慳油。
引擎:1,998c.c.直四i-VTEC
馬力:155ps/6,000rpm
扭力:19.2kgm/4,500rpm
傳動:4前速自動波
查詢:合群汽車(28278622)