李八方online︱我不是建制改演忠誠反對派 屈穎妍轉型變「黃屍」
蘋果日報 2020/12/10 19:06
屈穎妍李八方online藍絲林鄭月娥梁粉
屈穎妍此時此刻出嚟大鬧林鄭，肯定別有一番用意。（設計圖片）
「飛鳥盡，良弓藏；狡兔死，走狗烹」，藍絲健筆屈穎妍今日喺《頭條日報》撰文，開宗明義話「我不是建制派」，仲要力數特首林鄭月娥不是，相信唔少人睇完成篇文只有一個感覺：心涼。
屈穎妍篇文，八方唔盡錄喇，主要先「認錯」話3年前即特首選戰時睇錯人，其後就批評林鄭不懂民情、施政無能，完全未能解決眼前困境，即係藍絲口中「黃屍」嘅意見。最令人無言，係屈穎妍最後仲要自比國王的新衣入面嗰個老實小孩……🤢
唔少人之所以心涼，一、因為屈穎妍講嘅嘢，以前民主派喺議會內已經代表市民講過無數次，但就被建制派扭曲為政治化、抹黑政府甚至顛覆政權；而家民主派消失咗，施政無能失誤廢柴無料到成隻鑊，自然去咗建制派度，難怪一眾建制人物，如今要七情上面飾演扮成「忠誠反對派」，而且鬧林鄭無成本，何樂而不為？
二、屈穎妍喺建制陣營入面屬於「梁粉」系，須知道仲有一年多就特首選舉，而梁營據聞都蠢蠢欲動，屈穎妍此時此刻出嚟大鬧林鄭，肯定被視為別有一番用意。盛傳未必冇機會連任嘅林鄭，應該預咗要受返自己陣營嘅攻擊啩。
三、一波未平一波又起，號稱目標黨員25萬嘅「紫荊黨」殺到，若果真係成事，香港本土嘅建制派、土共仲有立足之地？而家仲唔轉型喺本土尋求支持，更待何時？之不過唔係話轉型就轉型到嘅，只怕藍絲支持者一轉咗去黃營，就一去無回頭啫。至於各路牛鬼蛇神建制派嘅角色扮演遊戲，同林鄭去留有冇關係？關鍵只有一個，習近平先係主角，集編導演於一身，其他人都只係茄哩啡。
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！