名人帶團一窩蜂幫趁全因信得過

蘋果日報 2002/01/17 00:00


香港一直奉行名人明星效應,在香港主要收益之一的旅遊業,這種現象更為突出。先有旅遊美食稱著的蔡瀾扯頭纜,辦日本團搞得有聲有色,接着又有形象貪玩好食的谷德昭接力。最近加入戰圈分一杯羹的是,資深跨媒體傳媒人李純恩。近日有旅行社更率先推出玄學旅行團,藉出名玄學家為號召,一場名人帶團旅遊大戰,似乎方興未艾,有排精采。 記者:朱文俊部分攝影:陳盛臣
李純恩
傳媒人變旅遊家
從事傳媒工作二十年的李純恩,去年中出版了一本關於上海旅遊飲食的消閒書,從此,他的身分除是跨媒體傳媒人外,更多了一個旅遊美食家的稱號。

一切由著書開始
突然間,李純恩變得非常紅,一口氣出了八本不同種類的書,由兒童圖書、漫畫、哲學、旅遊都有,主持旅遊電視節目添食到十七集,旅行社與他簽合約一年帶六個團,另他還替電影公司寫劇本,替電台做節目,短短八個月時間做了別人幾年的工作,一切機會皆來自多年努力經營的名人身分:「自己做咗二十年傳媒,由最初《香港周刊》(已停刊)到《成報》轉手離開,已感覺印刷媒體開始萎縮,但係自己有老婆有女,無理由坐以待斃。於是便一口氣接下不同類型工作,樣樣試,睇吓會唔會有其他機會,其中一樣就係返上海玩嘅時候,順便影啲相,返到香港發覺可以夠出一本書,於是就同出版社商量,出咗本《李純恩吃在上海》,估唔到咁好,賣咗一萬五千本,在機場書店暢銷書排行榜得第三名;跟住無綫電視搵我去主持旅遊美食節目,反應又好好,做做吓,新華旅行社又搵咗我去帶團,咁樣啲人就叫我做旅遊美食家。𠵱家喺機場或上海食肆,都會碰到有讀者攞住本書叫我簽名,嗰種有人認同成功感好大。」
團友溝通好重要
雖然以名家身分作號召,報名人數方面可說不用擔心,但已經帶了兩團上海團的李純恩,亦有擔心:「最大問題係自己脾氣幾大,見到唔好嘅嘢會出聲,當我帶住一團六十四人,年齡由兩歲到七十五歲團友時,個心就會驚,萬一有團友好野蠻點應付?又或者行程唔啱團友玩柴台又點算?試過有一次帶團友去上海瑞金賓館,該處名氣好大,毛澤東、鄧小平、甚至日本天皇都去住過,點知有部分團友本身係圍村人,對於舊時農村建築,見慣見熟,大家都覺得唔新鮮,咁我心諗死啦,點算好?當時我望住啲舊家具,靈機一觸,攞住杯酒過去,同佢哋傾吓偈,話畀佢哋聽,呢間屋係毛澤東住過,你哋食呢一餐,係跟足當年日本天皇個餐單做,講講吓,佢哋都變得有興趣,件事先解決到。當然都係啲團友畀面先落得台。」

行走江湖方便多
名人身分除有助與團友溝通外,在外行走江湖,亦有一定方便。李純恩邊笑邊說:「好似再搞北京團,去現在食烤鴨最出名嘅『九花山』訂菜,老闆知道我哋訂菜後,由原本每位一百元嘅膳食,自動增加到百五蚊標準,因為老闆認為我哋懂得欣賞佢嘅食品,寧願賺少一點。有店舖平日不做早市,卻專登為團友做早餐,呢種互相尊重最開心。」
谷德昭
「名人本身係Icon!」
早前同樣有份參與名人帶團的肥谷(谷德昭暱稱),對於名人帶團卻有另一番見解:「其實名人帶團就一定得嘅,因為你其實係賣緊嗰Icon,如果你個名唔得,旅行社就唔會搵你。要搞得好,就要喺行程方面落足料,呢啲係最緊要。」

有時間先再做
但當問到肥谷點解旅行社為何請他帶團,他卻表示:「主要因為我幫佢哋拍廣告,至於啲團友點解因為我帶團而幫襯,聽番嚟嘅就係覺得『呢條友信得過喎!話晒寫過飲食專欄,橫豎去玩都要使錢,不如就幫襯啦!』就係咁囉!」
至於日後會否繼續開拓這門生意,肥谷就表示:「都冇乜所謂,有嘅話梗會考慮,但最緊要係有時間,因為帶團真係要用好多時間。」
蔡瀾
名氣搭夠賺錢易
率先將名人帶團這門旅遊生意發揚光大的,非蔡瀾莫屬,有其他人入行分杯羹,表示並無壞影響:「這一行可謂各有各做,就好似做私房菜一樣,最緊要係信譽。你嘅材料靚,就會愈做愈旺,否則,就會慢慢淡出。每個人嘅客路都唔同,好似我由99年聖誕做日本北海道團,就設立一個『知己會』,一參加我哋旅行團就自動踢入會,所以生意一直都幾穩定。」

壓力細受尊重
問到蔡瀾有冇經營困難時,他報以一陣招牌笑聲:「其實冇乜麻煩,因為每次帶團都有助手,比較困難嘅係訂機票,因為我哋始終唔同旅行社,生意比較細,自然難攞機位,至於其他事情,如行程安排、食宿,我哋做得比人精,因為我哋去日本,好多食肆酒店都畀折扣我哋,以我哋嘅價錢嚟講,其他團一定要蝕本,一係冇我哋嘅水準!」
蔡瀾輕鬆表示,旅行團生意只是事業其中一環:「我自己一向鍾意去旅行,去到食肆酒店,啲人當你老爺咁拜,都唔知幾過癮,瑣事又有助手搞掂,我淨係行行企企影吓相,其實好舒服。」能這樣輕鬆賺錢,與名氣有關?蔡瀾微笑道:「如果話冇就係呃你嘅,生意有得發展,主要靠之前有做過旅遊節目,人哋覺得你信得過,當然,保持旅行團質素都非常重要。」
另類名人效應玄學旅遊行大運
為吸引更多旅客,不少旅行社在新春旅遊旺季,大搞另類新意,康泰旅行社就邀得著名玄學家蘇民峰,主持一個以玄學結合旅遊為主題的講座,指導巿民因應不同生肖及「寒命寒命」,選擇不同旅遊地點,講座反應相當不俗,吸引過百人士入場。
旅業議會百花齊放係好事
香港旅遊業議會總幹事董耀中表示:「旅行社搵名人帶團作招徠,只要旅行社能兌現承諾,就完全冇問題。名人可助宣傳,令旅遊業更百花齊放。況且名人通常會珍惜自己的名氣,相對嚟講,旅行團質素有保證,截止目前為止,並冇收過任何有關名人帶團嘅投訴。」
業界會否因名人帶團引起劇烈競爭而壟斷巿場?董耀中稱:「我認為發生機會好微,因為每個階層消費模式都唔一樣,正如香港有茶餐廳,亦有半島一樣,增加競爭會令業界發展更健康。」