每年兩會，都有唔少人大、政協委員大放厥詞，今年都唔例外，現為廣西自治區黨書記嘅香港中聯辦前主任彭清華噚日朝早出席廣西人大代表全體會議，明知現場開放畀傳媒採訪，都喺席間討論人大常委會工作報告，包括人大去年底對《基本法》第104條作出嘅解釋時，趁機打港獨同自決派，形容人大釋法係「大石砸死蟹」，做法振奮人心，仲希望被政府提司法覆核嘅議員「一鍋煮」（意謂一鑊熟）。明明係唔啱，卻講到咁正面，世界係咪已經癲咗？

曾力捧689上台

其實彭清華喺香港執掌中聯辦時都以強硬見稱，上屆特首選舉佢都有份力推梁振英上場，梁振英當選後翌日，仲親自到中聯辦「謝票」㖭！呢位鷹派人物同梁振英一樣，對港獨主張大力棒打，佢噚日喺人大會議發言時直指：「中央出手一錘定音，叫『大石砸死蟹』，這次就是『大石砸死蟹』，把港獨議員一下子就把他剝奪了」。
以為佢口出狂言應該到此？竟然係仲未止！佢跟住得意洋洋咁話，「而且這個法院也只能按照人大來判決，還有法律效力，還有幾個議員還在審，如果把這幾個『一鍋煮』了，這就做徹底了。最後還看法院怎麼判，這一次是非常振奮人心的」。
中央打橫行，突然就宣誓問題釋法，青政游蕙禎同梁頌恒被DQ，政府仲要覆核埋劉小麗、羅冠聰、姚松炎同長毛嘅議員資格，已經令唔少市民好憤怒，但呢啲無法無理嘅做法，卻護中共啦啦隊大力護航，仲要沾沾自喜。追源溯流，港獨情緒升溫，唔多唔少拜梁特所賜，作為捧梁特上場嘅彭清華，唔通真係可以置身事外，唔使問責？

李八方