大陸女星趙薇喺08年同富商黃有龍結婚，經過咁多年，佢哋身家億億聲唔使講，估唔到就連趙薇哥哥趙健一樣咁疊水，最近佢仲因為離婚，牽扯5.2億元人仔嘅贍養費而登上微博熱門搜尋。

投資過范冰冰主演嘅《武則天》嘅大陸製作公司唐德影視，噚日發公告表示，公司第二大股東兼董事趙健因為同老婆陳蓉離婚，將其持有之3202.2萬股（佔公司總股本的8.01％）上市公司股票分割。前妻陳蓉分得其中1921.32萬股，佔公司總股本的4.81％，折合市值約為5.2億元人民幣（約6.1億港元）。另外，趙健本人保留1280.88萬股，佔公司總股本的3.20％，折合市值約為3.46億元人民幣（約4億港元）。

大陸有報道曾質疑，監管層的減持新規出台後，可能有上市公司股東以「離婚」減持股份，今次天價贍養費事件，自是更加矚目。有大陸媒體指，透過離婚財產分割，趙健及陳蓉持有嘅股份雙雙下降至總股本嘅5％，有效避過今年5月份中國證監會減持新規中嘅規定。

但今次唐德影視二股東趙健離婚分割股權方式，應該係真嘅。如今股權過戶登記已完成，陳蓉將成為唐德影視第五大股東，趙健就係第六大股東。而陳蓉亦承諾，不會亦不可能在短時間內大筆減持套現唐德影視的股票。

俾人嗌佢係「娛圈畢菲特」嘅趙薇，細哥哥趙健7歲，前幾年趙薇負面新聞不斷，趙健多次挺身而出。當年陳坤與趙薇驚傳反目，有網民留言直指陳坤別有用心：「趙薇一定要有你這樣的『朋友』嗎？」不少趙薇影迷都認出呢位言辭犀利之人正是趙健。

兩兄妹感情既然咁好，趙薇自然有錢齊齊搵，拉埋哥哥一齊投資，陳蓉亦曾任趙薇經理人。趙薇兩公婆，連同趙母魏啟穎、兄長趙健等，一家人名下註冊同控股嘅公司至少有34間。趙薇夫婦控股之上市公司，包括阿里影業、馬雲旗下的雲鋒金融；連同A股上市嘅唐德影視，夫婦身家水漲船高。去年底趙薇以高槓桿收購A股萬家文化一事上觸礁，但最後趙薇「一蚊都唔使輸」，令人嘖嘖稱奇。

2015年，唐德影視上市近半年，股價飆升8倍，趙健亦有出席公司首個股東大會，當時他已持有唐德影視10.67%股份，接近15億人民幣，真正一夜暴富。