58歲嘅昔日樂壇教父小室哲哉喺90年代嘅J-pop界可謂呼風喚雨，佢更曾經係日本最富有音樂人，可惜12年前喺香港及海外投資失敗，搞到損手爛腳，總共損失約70億日圓後，九年前再驚爆詐騙案，被捕後遭一沉百踩，惡運似乎冇離開小室，其愛妻KEIKO於2011年10月因腦內蛛網膜下腔出血入院，當時情況嚴重，慶幸是KEIKO近年健康逐漸好轉，但KEIKO似乎唔再擁有動聽歌喉，一代歌姬已成絕唱........。

由小室一手捧紅嘅globe主音KEIKO，2002年嫁恩師小室，現年44歲嘅KEIKO重病後產生不少變化，記憶力欠佳，小室早前上節目指KEIKO似一個性格反叛嘅中一女生，二人感情亦如同父女般，小室同病後嘅KEIKO唱過三次K，但已唔似昔日般有精湛歌藝，如今已不能準確地發聲唱歌，消息令人欷歔。

小室噚晚喺社交網上載最新夫婦合照，佢哋拖住個小妹妹溫馨合照，只見KEIKO終於重現笑容，小室話當日外出對愛妻鍛練腦筋好有幫助，大批網民都留言讚好，仲話可以再見到KEIKO嘅笑容覺得非常感動。