華人騎師今午（10日）於沙田馬場唔係玩泥沙，而係在泥地嚟料，第四場四班泥地1200米，華將楊明綸爆冷贏「霸氣」（容天鵬馬房），單Win及組合獨贏A3分別派248.5及25元。

除了「霸氣」外，第二場巫顯東以「金剛之星」（沈集成馬房）勝出三班泥地一哩，換言之這天全日四場泥地賽的首兩場，都由華將建功。

講番七歲馬「霸氣」，此駒有傷患底子，包括先後兩度右前腿不良於行，呢次可謂戰勝自己，沿途守前列二三位形勢大好，直路透出後力頂到底，贏1.25馬位，獨贏着綠燈仍有24倍，飛到馬到爆冷得手。

「霸氣」相隔足足三年才重新贏馬，期間曾拉去吳定強馬房，這次亦是牠重投容天鵬馬房後首捷。「霸氣」本身至今四捷都在泥地短途1200米，呢鋪負輕磅勝出四班賽，加分後下仗未使升班住。

第四場前四名冷熱參半，亞軍由熱門之一「精英寶貝」拎到，呢匹三歲賽駒後上追唔到「霸氣」，近兩仗均於泥地短途做二奶，仲未打開服役勝門，連帶麥菲文馬房亦未打破泥地齋缽。季軍及殿軍順序為大熱「金地飛客」及冷馬「勁優秀」，四重彩派九萬一千幾。