當年今日
關於我們

【冇提員工點算】hmv清盤 蕭若元爆阿仔唔見十幾億:我冇覺羞恥

蘋果日報 2018/12/20 18:43

蕭若元蕭定一HMV清盤

年關難過!hmv數碼中國(8078)前日公佈旗下hmv零售自願清盤,約70名員工即時被遣散,臨時清盤人黃新強估計,仍有超過4,000萬未償還欠債,包括員工欠薪。集團主席蕭定一在聲明中表示,對門市全線結業感到非常可惜。
而身為蕭定一父親、時事評論員蕭若元在網台爆料,指hmv零售蝕咗4、5億元,蕭定一手揸股票市值唔見咗十幾廿億:「我係一個事無不可對人言嘅人,hmv香港零售總共有5間舖,hmv零售蝕咗幾多錢呢?我諗4、5億,作為實體店,經營係非常之困難,尤其香港租金咁貴;另外賣CD生意跌得好犀利,其實hmv近年主要賣headphone、音樂器材為主。」
蕭若元話如果蝕本生意睇唔到前景就要結業,呢個係商業決定:「我從來冇覺得好羞恥,做生意我認為運氣大於一切,當然有錯誤嘅決定喺入面,亦都有執行不力嘅一面,亦有大經濟環境一面,呢3個月香港經濟急劇變化,香港hmv喺7月之後,生意比舊年同期跌咗一半咁滯,我係從來唔會後悔,包括冇過問蕭定一嘅事,我覺得個仔既然30幾歲,你要畀佢獨立decision,如果佢乜都問過你,等於係你嘅decision。」
雖然做嘢永遠唔會後悔,但蕭若元認為要汲取教訓:「我並不以蕭定一呢次挫敗為恥,當然蕭定一嘅挫敗係嚴重,佢揸嘅股票市值唔見咗十幾廿億,但呢啲係數字遊戲,我作為爸爸,作為佢仔女嘅爺爺,作為佢老婆嘅公公,我係有最大責任,我係永遠感情上畀支撐佢哋,可能我冇能力完全挽救佢盤生意,但我有能力完全照顧佢哋嘅生活,甚至有能力幫佢東山再起,我有責任令到佢吸收教訓,以後聰明啲。」
蕭若元仲話自己願意為家人犧牲性命,呢件事令父子關係好咗好多:「幸災樂禍嘅人注定失望,我覺得你哋好似狗吠一樣,我唔會因為狗吠唔開心,關懷我嘅人放心,我依家係正面去繼續我嘅生命。」
然而,全段約11分鐘嘅說話,蕭若元完全冇提到失去飯碗嘅員工;曾在信和經營CD店28年嘅Carl,在社交網留言狠批:「員工臨年尾要辛苦籌措原屬自己的血汗錢。主事上市公司主席依然住喺億半西半山頂層複式。」
精選娛聞,喺晒《娛果》
http://fb.com/appledailyent