韓國天團BIGBANG成員由去年開始陸續入伍，現時只剩勝利仲未入伍。當中去年2月入伍嘅T.O.P喺服役期間被爆於寓所吸食大麻，佢因大麻案被判10個月有期徒刑，緩刑兩年執行及罰款12,000韓圜（約84港元），本身以義警身份當兵嘅T.O.P亦因大麻案而被革職，目前以公益兵身份服役。

未知是否因T.O.P身陷醜聞，日前勝利與男團Wanna One上節目《Radio Star》時，節目組竟禁T.O.P亮相。話說當時被問到Wanna One邊位成員係BIGBANG嘅相對位置時，勝利指姜丹尼爾就好似G-DRAGON一樣咁嘅存在，邕聖祐就似T.O.P，朴佑鎮似足大成。點知畫面上T.O.P嘅真樣就變成一個石塔，因為喺韓國，塔嘅發音同T.O.P嘅發音一樣。

網民發現後即將有關照片瘋傳，認為因為T.O.P曾捲大麻案而被節目組禁曝光，不過有網民就覺得此舉對T.O.P有欠尊重，同時亦唔尊重擔任嘉賓嘅勝利。

更多韓流，喺晒《娛果》
http://fb.com/appledailyent