台灣著名作家龍應台獲香港大學重金禮聘做首位「傑出人文學者」，噚日舉行講座，唔少達官貴人同文壇名家都嚟捧場，包括行會召集人梁振英、富商蒙民偉、工業家蔣震、著名作家董橋、自嘲「青樓名妓」嘅張永霖、公民黨黨魁余若薇同幾位黨友，連好少公開露面嘅大美人林青霞都係座上客，入場觀眾逼爆演講廳，坐滿樓梯、講台都未夠位，認真墟冚。
大美人婚後息影，平日深居簡出，唔輕易出席公開場合，八方噚日見佢風采依然，美貌不減神采飛揚，一套黑色裙簡單利落，拎一個螢光粉紅色袋好醒目，即時成為全場焦點，唔少「龍迷」見到大美人都嚟捧場，情緒更加高漲。據講大美人同龍應台一向好朋友，早排約埋一齊喺香港睇舞台劇《德齡與慈禧》，今次老友開講，自然要捧場。

專心聽　抄筆記

大美人演技好毋庸置疑，上個禮拜日開始喺《蘋果》寫專欄客座隨筆，分享自己演藝事業點滴，自爆曾與鄧麗君喺法國南部海灘裸泳，真係令人驚奇。噚日龍應台演講嘅時候，八方見大美人一直好專心咁聽，不時點頭微笑，仲有抄低重點做吓筆記，似乎有心拜師學藝，增強寫作功力。龍應台明年會開始寫作計劃，會挑選十個人參與，由佢領導動筆，條件係要有熱誠、有通透分析力同文筆好，大美人唔知合唔合乎三大條件呢？
龍應台噚日分享自己文學寫作嘅啓蒙經歷，佢話遠至春秋戰國年代嘅莊子、韓非子，到近代嘅胡適都對佢影響深遠。佢又百無禁忌，將細個喺台灣讀小學時教小朋友殺共匪、反攻大陸嘅舊課本都拎埋出嚟，更自爆唔少秘聞，包括披露佢17歲時，將中國情詩繙譯成英文嘅未出街作品。
龍應台話，同讀者溝通係一件好奇妙嘅事，因為大家素未謀面，卻可以透過文字心靈相通，佢演講期間不時突擊達官貴人嘅國學常識，梁振英都俾佢問到口啞啞，台下觀眾拍爛手掌，主持人之一港大校長資深顧問程介明都話估唔到反應咁熱烈。

mailto:[email protected]