這次飾演蝙蝠俠的是名不太見經傳的基斯頓比爾,本來誰做蝙蝠俠不太重要,反正戴了蝙蝠面具個個差不多,但比爾面上太沒有特徵,欠缺了以往幾位蝙蝠俠的神采,沒有米高基頓經常緊皺的雙眉、韋基馬的肌肉型嘴唇或佐治古尼的梨渦淺笑,老實說,看了大半齣戲還不太認得比爾,後來好點,因為他經常戴住蝙蝠面具,易認好多。
女主角姬蒂荷姆絲(即係湯告魯斯現任女友)表現不太突出,靚唔靚也見仁見智。配角方面則大陣仗,米高堅做管家,摩根菲曼做特別武器科學家,里安尼遜做亦敵亦友的老師,加利奧文做反派,渡邊謙的角色最無癮,絕對比不上在《最後武士》中有型。
同行的女伴本來很喜歡蜘蛛俠,但自從見到蝙蝠俠屋企好似白金漢宮咁架勢之後,當堂鍾意咗蝙蝠俠,「不過都係蜘蛛俠着數啲,俾蜘蛛俠咬咗一啖就搞掂,唔使好似蝙蝠俠練得咁辛苦。」咦?係喎,原來女伴咁有智慧,另眼相看。