33歲嘅李彩華(Rain)今年首推寫真，今午佢就現身書展，性感熱褲、黑絲、低胸到到宣傳佢本寫真。佢話今日第一日書展，所以好開心，一定要嚟宣傳吓。Rain話因為明天就要飛返大陸拍劇，所以只得今日可以到書展宣傳，講到出寫真得到好多朋友嘅支持，男友何遠恒亦有睇過本寫真，都大讚好靚，但就嫌棄唔夠勁(性感)。記者追問佢又覺得夠唔夠勁呀？Rain話：「我就有諗過勁唔勁，性唔性感囉！反正第一次出，其實多年嚟都好想出寫真，只係一直都冇適合機會，直至今次遇到呢位攝影師，但都只得兩日時間拍攝，記得拍攝前剛喺江西拍完嘢，就即返香港，但又怕飛機會delay，所以就坐咗8、9個鐘車返香港，得兩日時間籌備，真係好趕。」

Rain再講，雖然今次好倉卒，但就好滿意成本書嘅效果。佢又提到自己呢個年紀先推出寫真，但就唔會同場嘅o靚模比較，因為本書係為慈善，會將寫真扣除成本後捐予「愛基金」，幫助山區嘅兒童。Rain又話寫真喺大陸嘅反應都好好，預訂數目有八萬本，記者取笑佢已有八萬本銷量，當然唔使同班o靚模比較啦！佢就笑住話：「又唔可以咁講，純為慈善做好啫！香港預訂我就未知，但最緊要係幫到人囉。」

講到寫真都有性感，但Rain就話自己嘅相以唯美為主，唔會意淫。佢仲提到拍攝時，成隊工作人員都係全女班，其中一個鏡頭上身赤裸，只着住黑色絲襪，要用腳遮住重要部位，真係幾大膽。問到咁大膽男友都嫌唔性感？Rain笑言：「我都唔知，可能下次佢要親自操刀。(佢操刀？)唔係嗰啲，唔係意淫嗰啲相，不過其實男友影相真係唔叻，成日影到我個身好短，所以我都要教佢點影，訓練到佢影得靚啲囉！」