【韓流】絕招對付黃牛黨 IU事務所贈票予舉報粉絲
IU
韓國「國民妹妹」IU今年出道10周年,下月回歸嘅IU早前公佈將舉行10周年巡唱,首站會於下月28號喺釜山展開,並會於12月8號唱到嚟香港亞博館,之後會再到新加坡、泰國及台灣繼續巡唱,當中台灣站更喺平安夜及聖誕節舉行。
由於IU深受粉絲歡迎,所以每次門票都會掀起搶購熱,亦會引來黃牛黨關注。而IU所屬嘅Kakao M事務所為咗杜絕黃牛黨,就實施咗勁嚴厲嘅措施趕絕佢哋。當中Kakao M方面如確定門票係經不當交易購買時,就會購買個張門票並取消該座位,同時會對有關人士採取法律責任。
而受到粉絲讚不絕口嘅就係Kakao M會鼓勵粉絲舉報呢啲不法份子,如果發現證據確鑿嘅話,Kakao M仲會將門票送畀舉報嘅粉絲,鼓勵粉絲作出舉報。Kakao M利用呢啲絕招對付黃牛黨受到網民大讚,仲話其他公司都應該效法IU嘅公司一樣,積極打擊黃牛黨同時,又可以答謝一直支持偶像嘅粉絲,可謂一舉兩得。
精選韓流,喺晒《娛果》
http://fb.com/appledailyent