近期愛上玩facebook嘅天王黎明（Leon），之前宣佈4月28至5月3日會喺中環海濱活動空間嘅摩天輪旁搭建一個恒溫帳幕，舉行一連6場演唱會。雖然官方仍然未正式公佈票價，但係心急嘅樂迷都由唔同渠道收晒風，話最高票價盛惠2,980元！

有嘢送有嘢玩

Leon今次嘅門票分咗三個價錢，最貴嘅係鑽石級套票，價錢要2,980元，價錢唔單止高過晒所有香港天王天后過往嘅開騷價，其餘票價分為1,980元同980元，甚至追貼美國樂壇天后麥當娜（Madonna）港騷普通位最貴嘅2,488元，官方公佈就話演唱會會加入嘉年華元素，樂迷唔單止可以得到贊助銀飾品牌Tiffany & Co.送上驚喜，仲可以喺開騷前入場享受美食同玩盡現場娛樂設施。
不過近5年冇開演唱會嘅Leon，今次衝出紅館，成為首位喺摩天輪旁開演唱會嘅歌手，仲要重本玩4D，收得咁高高高嘅票價，相信都會交足功課 !
撰文：馮仁昭