【掛住點解唔打俾我?】「因為電話冇電」52歲郭政鴻三父女 爆笑妙問妙答
郭政鴻怪獸家長專訪父親節Kaley
「世上只有」…嘅母親節過後,6月就輪到「強人是你」…爸爸嘅大日子。
今年52歲,已為兩女之父嘅郭政鴻,大女倩欣(Kaley)今年8歲,細女詠之(Ashley)6歲。自言主力唔係教,唔係鬧,而係錫兩個女嘅郭政鴻,一講到兩位前世情人,就即刻笑住話:「0依家返大陸做嘢,真係少咗時間陪佢哋,所以一返香港,就會抽時間陪兩個小朋友去游水同落公園玩。」此時,郭政鴻身邊細女Ashley即笑住話:「鍾意爸爸帶我哋去嘉年華。」然後攬實爸爸錫錫,郭政鴻即笑道:「你梗係鍾意去嘉年華啦,鍾意玩機動遊戲吖嘛。」
趁考試季節未到,呢日郭政鴻就帶咗兩個寶貝女去觀塘一間Playhouse玩冰壺,爸爸悉心教囡囡玩,兩個跳跳紮嘅小朋友,就乘機跳上爸爸身上做牛角扮樹熊扭抱,三父女玩到忘晒型仲瞓喺地下大笑。
望住身邊兩個囡囡,郭政鴻一副冧樣話:「冇辦法啦,一個都話搞得掂啫,兩個就要搏命搵錢㗎啦,要搵食,大陸個市場始終夠大,登台、拍網劇、拍戲,仲有商演同剪綵,如果唔係佢哋邊有錢讀書呀。」
問爸爸唔喺身邊,會唔會掛住爸爸,大女Kaley即點頭話:「掛住!」係咪真㗎?Kaley答:「真㗎!」妹妹Ashley高八度再大聲答:「真㗎!」
郭政鴻攬住Kaley問:「掛住點解唔打電話俾我?」答案係:「因為電話冇電。」郭政鴻笑到抱住個肚。
嚟緊父親節,兩個囡囡都話已經諗定會自製一份禮物俾爸爸,問佢哋送乜?妹妹即舉手搶答:「學緊整禮物呀!」咩禮物?人細鬼大嘅佢話:「唔講俾你聽!」
咁爸爸惡唔惡㗎?Kaley即答:「唔惡!」媽媽惡啲?「係!」點點頭。
係咪黐爸爸多啲?Kaley話:「兩個都錫。」Ashley跟住話:「兩個都一樣!」郭政鴻都不禁甜笑:「咁識講嘢!」但係問姊妹爸爸有乜嘢嘢令佢哋難忘?家姐就話:「諗唔到。」然後問細佢兩年嘅妹妹:「你諗唔諗到?」「諗唔到。」郭政鴻打圓場:「因為樣樣都好難忘!哈哈哈哈!」
自言唔介意係外父相嘅郭政鴻,就話:「唔會追啦,唔夠精力,照顧兩個小朋友已經好講時間同魄力。」
想隨時獲得更多親子資訊,快啲like Easy PaMa Facebook啦!
https://goo.gl/1qWM8g
即使返大陸搵錢,郭政鴻亦會打俾兩個女向佢哋「報到」。
由於少返香港,郭政鴻一返香港就會抽時間帶小朋友去玩。
契媽超雲舊年新年都有見契女,攬實唔願放。(網上圖片)