滙海探戈:伊神關顧 蘋果諗得過 - 奇兵

蘋果日報 2013/10/25 05:20

滙海探戈

美國今個禮拜板腦市場大戰,蘋果、諾基亞同微軟齊推新機,當中新推出嘅iPad Air最搶眼,部機瘦身成功得1磅重,輕咗成個碼,最估唔到係蘋果改作風,第二代iPad Mini唔單止配備Retina高清解像,整體規格竟同iPad Air看齊,硬件級數升晒呢,雖然價錢貴番啲,亦冇傳聞中嘅土豪金色,但外界評價普遍唔曳,應該幾賣得,蘋果行政總裁庫克今次都算有交代。
講開蘋果,佢呢幾日又俾企業狙擊手、美國億萬富豪伊坎(Carl Icahn)啄住唔放,佢兩個月前自爆持有大量蘋果股份,約見庫克要求蘋果增加回購股份振股價,但蘋果至今仍不為所動,所以伊坎前日又發功,喺twitter自爆話俾咗封信庫克,斷估又係施壓逼蘋果回購股份。
此君出名來者不善,俾佢睇中嘅公司,管理層通常有排煩,但當中的確唔少係寶藏,例如今年美股升幅王、網上影片公司Netflix就佢嘅代表作,舊年年底58美元掃,周二曾升到380美元就出貨一半,一年唔到就執5倍,計埋賬面果啲執過百億港紙,年初掃保健公司康寶萊又執近40億港銀,畀佢睇中嘅多數升幅驚人,揀股如有神助,堪稱投資界嘅「伊神」,以往績論,跟佢買蘋果都諗得過。
滙市方面,美國政府停擺16日損經濟,加上9月非農業職位僅增14.8萬份,為經濟前景增添陰霾。高盛等大行紛紛轉軚,料儲局明年3月至開始退市,債券大王格羅斯更估計儲局2016年前都難以加息。
事實上,美國停擺可謂累己累人,其中係佢旁邊嘅加拿大就首當其衝,其央行周三議息後,唔單止下調未來三年經濟增長預測,仲刪除埋傾向加息的暗示,令市場大感意外,加上油價跌至3個月低位,紐約期油曾低見96美元,不利加國原油業,所以係息口及經濟因素夾擊下,加元本周走勢麻麻,美元噚日升穿1.04加元,料加元短期未跌完。
歐元方面,歐洲央行周三公佈,為加強區內銀行業穩定,出年將會幫區內128間大行做壓力測試,但由於今次壓測嘅準則比較「辣」,加上歐央行行長德拉吉表明會從嚴,唔合格嗰啲可能冇得留低,搞到啲歐銀股價腳仔軟。
不過,市場覺得壓測長遠有利區內金融穩定,加上滙市繼續炒作儲局唔收水,所以消息無損歐元升勢,噚日仲升到1.3822,再9創兩年新高。

內地拆息升 澳元chok

雖然美元仍偏弱,但澳元紐元呢幾日就幾chok,主要因係人行連續三次暫停逆回購,令內地拆息扯到4厘樓上,令市場擔心內地資金市場緊張情況重現,由於內地經濟與澳洲息息相關,澳紙禮拜三單日轉向,由97.59美仙高位掟番落96邊,紐元亦面對同一情況。
奇兵
本欄逢周五刊登
有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange