工聯會雖然係建制派中堅，不過卻唔係煲呔義無反顧嘅盟友，上屆立法會，有「煎釀三寶」之稱嘅陳婉嫻、鄺志堅同王國興，經常同煲呔撐到「行」，煲呔視三人為「頂心杉」係公開秘密，差在禮賓府冇出告示，指明佢哋係不受歡迎人物。

今屆工聯會有葉偉明、王國興、黃國健同潘珮璆四個議員，火爆嘅嫻姐同鄺志堅退下，卻始終不能與同煲呔搞好關係，新丁葉偉明更加繼續前輩衣鉢，最近幾單嘢都不留情面同政府唱對台戲，搞到煲呔越來越唔like佢，噚日仲喺答問大會公開鬧人。
事緣煲呔喺答問大會上講，標準工時好似最低工資咁，唔立法做唔到，代表打工仔嘅葉偉明聽到當然兩眼發光，提問時就針對呢項德政出擊，猛問煲呔點解唔承諾任內立法？煲呔原本都㩒實把火，話既然已經對研究標準工時開綠燈，大可慢慢傾，唔應該咁快逼政府，暗示議員應該見好就收，唔好諸多聲氣。
葉偉明對呢個答案唔收貨，追問時上晒身，指煲呔開出期票，研究標準工時到喉唔到肺，質問佢係咪面對勞工界壓力，先至喺施政報告寫幾句敷衍吓？係咪為下一屆政府埋下政治炸彈吖？呢兩個問題拮到應，煲呔即時發作，黑晒面話自己好尊重議員，都希望議員尊重議會，語氣之重都算罕見。

議員鬧官員係天性，煲呔亦唔係俾人鬧得少，今次咁惡，原來背後有啲嘢，八方聽聞煲呔對葉偉明喺堆填區風波中，係咁追打政府頗為不滿，身為建制派，發言批評卻絕不留口，用詞甚至犀利過泛民主派，八方收到風，政府中人早前已向工聯會「放話」，傳達葉偉明唔識收掣，已經惹起部份官員不滿嘅訊息，言下之意係想工聯會睇住葉偉明，小罵無妨，最緊要大幫忙，切勿假戲真做。
辣㷫煲呔，葉偉明同八方講，其實唔係今時今日嘅事，舊年立法會佢質煲呔扶貧力度不足，煲呔回應時都發脾氣。有官員指葉偉明擺明車馬下屆要去直選，預咗佢越來越激，呢啲伎倆，選舉前夕司空見慣。

mailto:[email protected]