o靚模周秀娜呢期真係風頭躉，上個禮拜升呢踩入科大做學術講座嘉賓，點知事後俾人插到體無完膚，笑佢冇料兼露餡，始作俑者科大都俾人鬧埋一份。喺一片人云亦云喧鬧嘅指罵聲中，噚日終於出現一股清流，明光社總幹事蔡志森力排眾議為周秀娜平反。

批評學者扮高深

噚日理大同三聯書店舉辦「尋思o靚模」文化座談會，邀請蔡志森、學者、傳媒人議論所謂o靚模現象。今次冇請周秀娜，到場記者一隻手數得晒，聽眾以超齡電車男同熟女為主。明光社又稱「道德塔利班」，八方以為蔡志森會將周秀娜視作傷風敗德「妖孽」咁好好修理，誰不知錯晒。
蔡志森話對於科大請周秀娜講talk有保留，因為咁樣做，等於肯定周秀娜係好成功，暗批科大後，佢語氣一轉，竟然讚周秀娜一啲都唔膚淺！蔡志森就話成件事根本就錯在啲學者扮高深，特登問埋啲深到冇朋友嘅問題，就算係普通人，一樣會好似周秀娜咁樣答法。意下之意，並非周秀娜冇料，只係學者扮有料啫。
蔡志森憐香惜玉，卻不代表佢攬晒所有o靚模，佢話o靚模文化盛行令人擔心，小朋友睇到姐姐着得咁少布，恐防會影響細路仔日後身心發展。經濟唔好失業率高，高官統統入晒金融海嘯數，原來o靚模都係金融海嘯副產品，蔡志森指金融海嘯後好蕭條，廣告公司冇budget請超模，惟有改請肯剝又肯收少啲錢嘅o靚模，加上香港人笑貧不笑娼，總之賺到錢就係叻女，人人將o靚模捧上天，造就o靚模湧現風情畫。

Young模急流勇退

噚日講座有特別嘉賓現身說法，城大應用社會科學系學生利佩宜做過幾年兼職模特兒，佢強調自己只係Young模唔係o靚模，有時出show俾人誤會係o靚模會覺得唔舒服，所以喺o靚模湧現時急流勇退。佢話o靚模出現後，拖累成個模特兒行業形象，令人以為個個model都係貪慕虛榮同衣着性感。回想做Young模日子，利佩宜話獲益良多，學識溝通同表達技巧，又識到好多人，家個行業搞成咁，令人難過。
mailto:[email protected]