私駕路：矽谷首試　七人電動房跑　六大滿足

蘋果日報 2012/07/23 00:00

兩年半前第一次路經Tesla總壇試第一部車Roadster，今日又再次成為第一位香港傳媒首試Tesla的新車ModelS。試過這部五門七人電動房跑，絕對並非一個快字了得!

撰文：AmosWong
攝影：AmosWong、DonFeria
近年來講車，都電車前電車後，周末去中環大會堂泊車，加埋有三十幾個充電車位，政府又話年底整夠一千個充電點。撇開政府以至大機構團購，單計私家車，香港最暢銷電動車，其實來自美國加州矽谷：TeslaRoadster。過百萬港幣一部，都賣出半百，香港最後兩部，聽聞有五個人爭。最後兩部？全中，因為Tesla已將Roadster停產，由ModelS接班，因為一次過滿足六個願望嘛。
empty
■新廠房位於加州Fremont市南部。
empty
■副主席GeorgeBlankenship以前管蘋果零售策略，今日講解試車路線。
一．又靚又型
講靚，始終好主觀，嘗試用另一個角度講：講流線形又如何呢？TeslaModelS風阻系數Cd0.22。風阻系數低，固然代表外形流線，對慳油（ModelS就慳電啦）以至高速行車穩定性，都有幫助。事實上ModelS比大部份同級對手，都更長更闊更矮，車形有種俯伏氣勢。
empty
■風阻系數要低，其中一大法門：車底平滑。
empty
■ModelS車形視覺上以至事實上都十分低矮。
二．好快好彎
試車路線包括廠內一段無限速私家路，推背感覺當然比兩座位Roadster低，不過電動車始終有低轉扭力優勢，我試一部標準版已好快，馬力362匹，扭力一起步就有45kgm，0-60mph不過5.6秒。超級Performance版馬力多54匹，扭力多16kgm，0-60mph只需4.4秒。至於彎路表現，ModelS以電池最重，一塊過變成車底，所以重心非常低，掟彎零傾側，車身定到嚇死人。
empty
■車架車殼主要用鋁造，因為重量輕。
empty
■錶板沒有指針，整個都是LCD顯示屏。
三．坐七個人
超跑已無謂擁有，因為四門房車最實用？不過ModelS不單止門開五道，車尾箱再有兩個兒童座位，坐滿七個人，車頭依然有個行李箱。何解ModelS空間多多？因為尺碼比同級大？其實不過長少少闊少少，最大分野始終在於電動車優勢，馬達遠比引擎細，連波箱可以輕易安置於一對後轆之間。
empty
■如果拆走兒童椅，尾箱容量都幾大。
empty
■後軸中間，馬達連波箱非常小巧，造就ModelS特大車廂空間。
四．豪華高級
ModelS走Premium行政房車路線，真皮車廂、伸縮門柄、電動尾門全屬標準設備，碳纖飾板以至雙天窗都可以選配，不過最精采設計，要數中控台一幅過17吋Touchscreen，簡直車壇首創，代替所有多餘按鈕，真正矽谷品味，不愧為Smartphones以及Tablets之發源地。
empty
■17吋Touchscreen中控台有好多功能好多版，包括導航、音響、空調。
empty
■車廂設計低調，但真皮木料甚至碳纖都有選擇。
五．罕見特別
電動車少有，其實美國車更少有。Tesla之前，香港已廿幾年未有美國行貨車。開車出街，個個無知，啞口無言，非常過癮。試車當日，當地居民見到TeslaModelS，人人都會向新車直豎拇指。
empty
■試車期間，廠方職員不停問路面感受，態度肉緊。
六．環保！
事到如今，無話可說。ModelS行電，你從此告別油站，只需要返工時段又或者夜晚瞓覺之時充電。完完整整充一次電，ModelS標準版續航力265km，中間版續航力368km，頂級版續航力480km，講完。
empty
■左尾燈側面尖端，揭開紅色細反光板，就有充電插頭，好隱蔽。
首批頂級Signature版
幾時抵港？右軚最快要2013年。價錢？電動車豁免首次登記稅，估計都要由60至95萬港幣不等，視乎馬力續航力。想落訂可以上Tesla官網 http://www.teslamotors.com/models或查詢：31840555。首批車叫Signature版，全部頂級配備，左軚售罄而右軚仍然有Quota。
empty