文彼得和陳偉豪同為香港澎馬流浪球員,同是二十二歲,並齊於今年加入娛樂圈。文彼得(Peter仔)剛簽約英皇娛樂,成為金牌經理人霍汶希的力捧新星。而陳偉豪今年初簽約娛圈紅人陳達志(Ba叔)的雅柏娛樂,並曾演出電影《我要做Model》。
仍專心踢波
由於兩人效力同一球隊,故私交甚篤,一星期總有六日要一起練波,日前文彼得和陳偉豪隨隊於九龍仔公園的草地球場練波,一臉孩子氣的Peter仔遠遠看見高頭大馬的陳偉豪,即跟他打招呼。兩人合照時,陳偉豪更擺出騎呢姿勢。
對於加入娛樂圈,Peter仔說:「暫時我都會以踢足球為主,因為有把握啲,足球會係第一位。拍戲嘅嘢等公司負責啦,我阿哥都叫我試吓,睇吓得唔得,當多條出路。」
Peter仔有不少足球fans,問到球迷有沒有反對他加入娛樂圈時,他坦白說:「有呀,佢哋唔贊成居多,因為佢哋以為我唔踢波,會嘥晒,又驚影響水準。英皇簽我都因為我係足球員,所以我唔會輕易放棄足球。」
讚Boy'Z活潑
早前Peter仔與Boy'Z和梁洛施(Isabella)同為報章拍廣告,不知Peter仔對他們的印象如何呢?他笑說:「Boy'Z好活潑,Isabella好靜,嗰日佢講嘢都唔知有冇五句。」
採訪:朱倬誼
攝影:陳偉權