羅理雅挾三屆澳洲悉尼冠軍威名攻港，初時係威係勢，但近排表現下滑，兼且騎「共創美夢」開齋阻人被罰稍後停賽三日，禍不單行，連帶支持度亦明顯減少。呢晚羅理雅只得三匹座騎，連湯智傑都不如，不過跑慣碼頭嘅佢，見自己個勢不能再弱下去，馬上捧盃一顯身價，第七場三班1650米，幫鄉里練馬師賀賢騎「奪金」，留前鬥後一攻而破，輕取亞、季軍「香港興旺」同「皇者拍檔」，贏得滙豐百週年紀念碗。
今場係羅理雅在港首度捧盃，「奪金」抽1檔兼打王牌，結果畀落飛黨一箸夾中，由15倍過外急劇打至7.2倍開跑，涉及注碼約180萬，落飛黨扣本後獲利約1,100萬；搭「香港興旺」Q及位置Ｑ亦落飛着晒綠燈，好似預知賽果咁，真係好過去搶！所以話賭馬臨場要隨機應變，好似今晚咁專攻1檔同王牌馬，加上睇埋邊啲馬落飛，贏錢自然話咁易。