救人一命老英雄蔡進生，為退休三行工人，家住屯門區，經常在屯門海翠花園海旁垂釣。雖然他被冰冷海水浸得全身顫抖須入院觀察，但講述救人經過時仍興致勃勃。
幸兩漢下水施援
「當時八點鐘，我喺海邊釣魚，突然有人大叫『有人跳海』，見一個阿伯喺海中浮沉，我立即將岸邊一個水泡拋畀佢，但佢完全冇反應，我就跳落海救佢。」蔡承認一跳落海曾有點兒後悔，並強調非貪圖做港府日前公布可獲六百萬的「捨命英雄」而「搵條命較非」！
「啲水真係好凍，但救人緊要只好死頂，搏命攬住阿伯游埋岸邊，但我始終年紀大，氣力好快唔掂，游得好辛苦，好彩有兩個人跳落海幫我手。」
在蔡拚命救人期間，附近當值的一名小販管理隊助理管理主任盧國強，及一名途經的休班救生員亦即時跳下海中協助救人。消防員及警員稍後接報到場，眾人合力將姓李八十八歲患有精神病的自殺老翁救起，送往屯門醫院救治。
「救咗人好開心」
「救咗人我好開心，雖然今次有啲驚險，我𠵱家重未『回氣』重好凍，但下次如果再有機會，安全情況許可下，我仍會協助救人。」蔡進生經檢驗後，已無礙出院。
另一名救人勇士盧國強，曾任十多年救護員，三年多前轉職小販管理隊。「我冇接受過水中救人訓練，啲海水好急，又多大石，雖然有水泡喺身，但情況仍然好危險。不過當時只想盡力救人，冇想得太多，好彩我哋三個人救一個人，阿伯亦冇掙扎，如果唔係重危險。」雖然危險，但救人成功令他有難言的滿足感。
在今次事件中有份救人的另一名休班救生員，卻甘願當一名「無名英雄」，游回岸上將身弄乾，悄悄地離開現場。