當年今日
關於我們

中環在線:彤叔孫大將風範初露 - 李華華

蘋果日報 2007/11/19 00:00


新世界發展主席鄭裕彤位乖孫鄭志剛,𠵱家係系內新世界百貨(825)同新世界中國(917)嘅話事人,佢喺新百貨今年7月上市時初露頭角,咁啱今年係新中上市8周年,再為佢帶嚟另一個表現領導才能嘅機會。
話說鄭志剛上周六同一班記者喺北京茶敍,一坐低就滔滔不絕咁講新中未來發展,不過最令華華印象深刻嘅係,佢當晚出席新中周年晚宴一個小舉動。
當晚有一個為聯合國兒童基金會籌款嘅拍賣環節,共拍賣6幅畫,畫家係嚟自內地11個城市嘅小朋友,頭一兩幅畫順利以約6萬元人仔成交,競投氣氛激烈,但當一幅有如西瓜怪俠嘅畫作推出,全場即時鴉雀無聲。
鄭志剛好識做,率先舉牌,其他人見到亦開始競投,幅畫最終俾其他人投咗,而鄭志剛就用6.5萬人仔投咗另一幅。籌到嘅錢全部會資助山區小朋友設置圖書館。
講開又講,彤叔老友恒地主席李兆基今年抱孫,華華當然都要為彤叔着緊吓,八吓鄭志剛有冇女朋友,點知佢腼腆咁話私人嘢唔答。惟有下次再問過啦!
empty
鄭志剛