早前因勞工組疑似勞資糾紛導致5名執委集體辭任、幾十人拉隊退會嘅街工，原來本月中（22日）已經低調進行補選，除咗近年屢成戰靶嘅梁耀忠，連同另一上屆執委陳瑞銘繼續留任之外，不少資深會員甚至元老級都再次出山「救亡」，包括創會第一個職員蘇耀昌、94年開始擔任葵青區區議員嘅梁志成等，但主席一職就由13年加入、前年曾參與嶺大圍堵校董事件的25歲盧藝賢擔任。

執委會可由7至9人組成，今次補選後就有8人在臨時會員大會下，各以過半數支持當選，任期去到19年，新任執委包括主席盧藝賢、鍾淇鋒、梁靜珊、蘇耀昌、梁志成、陳瑞銘及梁耀忠。勞工組風波中被指拒絕公開財政狀況嘅業委會人數則由兩人增加至四人，包括梁耀忠、陳瑞銘、盧藝賢及鍾淇鋒。

今次街工大地震，蘇耀昌指退會嘅大多係近年加入的新人，但新任主席盧藝賢強調目前剩番嘅40幾人之中，三分一都係35歲以下，「青黃不接就絕對唔係」，佢仲話「留低嘅人相信理念不會差好遠」，目前最重要係協助街工重整旗鼓，「我哋從來都係勞工團體，紮根係社區，三十年都冇變過」，形容要「毋忘初衷」。

至於勞工組風波，蘇耀昌強調至今都沒有解僱旺角勞工組三名成員，但已去信對方，希望對方若未能達致自負盈虧，就遷回葵芳，以節省資源，仲等緊對方回覆。之但係事情鬧到咁僵，搬返同一屋簷下都未必行得通，難怪連蘇耀昌都坦言「係睇點樣分手好啲」，又話點都好，希望街工可以重新出發。