現年39歲嘅韓國女星李娜英，大前年與男星元斌結婚，並於同年12月升呢做媽咪，無論婚前定婚後都相當低調。做人母後李娜英亦甚少公開露面，只係間唔中拍廣告吸金，就連預計今年上映嘅新片《Beautiful Days》，亦係李娜英相隔6年嘅作品。

而今日就有報道指，李娜英主演嘅《Beautiful Days》成為今年「第23屆釜山國際電影節」嘅開幕影片，同時李娜英亦會現身今日舉行嘅記者會，喺會上為新片宣傳，令粉絲大表期待。李娜英今日身穿連身短裙晒腿亮相，夥《Beautiful Days》導演一齊出席記者會，對於電影被選為開幕影片，李娜英表示「好榮幸」，續指：「片中嘅角色係一直都好想挑戰嘅角色，所以都好畀心機演出，好好奇大家嘅觀後感。」

「第23屆釜山國際電影節」於下月4號至13號舉行，邀請咗79個國家合共323齣作品參與，至於港產片、葉問系列外傳《張天志》就成為電影節嘅閉幕電影。

精選韓流，喺晒《娛果》
http://fb.com/appledailyent