一飛沖天去嘅除咗穿梭機，仲可以係俗稱「尿袋」嘅外置充電器。讀者潘先生話，本星期日（22日）晚瞓唔着，起身去書房整理BB嘅相時，放喺書枱面、當時冇充緊電嘅新買尿袋突然膨脹，不斷發出氣體洩漏嘅「吱吱」聲，之後飛出書枱，先撞向房門，然後再反彈射向衣櫃，最後跌落地解體，電池外殼同內膽分開。

保養商未決定回收

尿袋嘅電池事後發出火紅色，似乎有咁上下溫度，而Little Twins Star卡通外套早已熱熔。潘先生話嗰尿袋係當日晏晝同老婆喺旺角信和中心一間店舖購買，外盒亦有香港保養商資料，佢事後即時同保養商聯絡，保養商話要攞返產品殘件並賠償產品價錢同埋其他損失，但佢擔心產品有潛在風險，最終拒絕安排。
潘先生話已向警方報案，落咗口供，而海關亦立案調查。
尿袋嘅保養商發言人話，公司對事件非常抱歉，正向事主了解事件，但強調產品推出市面發售前，已取得本港所有要求嘅認證。
保養商又指產品自今年3月推出至今，只收到事主一宗意外，事後已停止批發涉事產品，但需等待第三方測試得出結果後，再決定係咪回收產品。