現年38歲嘅韓國女星李寶英，自前年為演員老公池晟誕下愛囡後，就專心做家庭煮婦、喺屋企湊女，對上一齣作品已經喺2014年嘅《神的禮物14天》，近日佢終於復出拍新劇《悄悄話》，孖李尚允、權律等人合作，劇集將於本月27號首播，接檔老公池晟主演嘅《被告人》。

劇組噚日公開咗一眾演員讀劇本嘅花絮照，今日就公開劇組拜神嘅相，據劇組透露拜神儀式於前日喺SBS製作中心進行，李寶英、李尚允、權律、朴世榮等逾200名台前幕後一同出席，希望劇集拍攝能順利完成，唔好有人受傷，拜神儀式後劇集正式開鏡。

不過劇集開鏡前，李寶英、李尚允、權律、朴世榮4位主演已率先拍攝定妝照，劇組同時於今日公開，只見李寶英身穿綠色露肩上衣，表情相當冷漠。