日本大堆頭組合AKB48嘅姊姊組合SKE48嘅成員木下有希子、二村春香同岩永亞美,今日喺灣仔會議展覽中心舉行嘅C3日本動玩博覽舉行迷你演唱會,除咗吸引300名幸運fans入場外,亦有過百名粉絲喺欄外圍觀。
大會禁止觀眾攝錄,不過依家人人一部智能手機,其實好難阻,現場當然仍有fans偷拍,三位SKE成員唱到跳起外,其中二村更唱到爆衫鈕,隊友岩永被現場fans嘅熱情打動到忍唔住喺台上流淚。
首次離開日本演出嘅岩永話:「沒有想過會有這麼多人來捧場,我一感動就易哭出來。」至於二村同木下已經唔係第一次來港,佢哋透露今次有四處遊覽,也到過旺角食甜品,又表示私底下會寫信兼送相片俾將會離開AKB嘅大島優子。