國際金融「大鱷」索羅斯（GeorgeSoros）嘅舊拍檔、量子基金創辦人之一的羅杰斯（JimRogers）早排警告，隨着次級按揭危機擴散開去，美國樓市一旦崩塌，「泡沫」地區嘅樓價可以大跌四至五成，到時會有好多人拖欠供樓，仲會拖累新興市場經濟。Burritosburritos1喺《MSN討論區》問：「美國樓市會唔會跌得咁慘？」
TheDevilsAdvocate講：「喺美國樓市嘅「泡沫」區，例如加州、佛羅里達州，樓價有機會跌40至50%，並會波及其他地區，影響範圍可能大過預期。」
Herring話：「由於美國過去幾年利率上升，加上信用欠佳嘅按揭借款人太多，佢哋一旦無力供樓，銀主盤就會湧現，增添樓市壓力，美國部份地區嘅樓價可能跌到2001年『911』事件前水平。」

陰謀論　放風撈着數

Covercalls就比較樂觀，認為美國樓價最多只會跌兩至三成，仲話到時係趁低吸納良機。MillertheLarge認為華爾街唔少專家都曾經睇錯市，所以羅杰斯嘅預測值得商榷。pennypincher1974a發表陰謀論，指羅杰斯希望打擊投資氣氛，乘機渾水摸魚。
相反，Wolfram74就好悲觀咁話：「根據薪金同樓價之間嘅關係推算，美國部份地區嘅樓價或會跌25至50%。過往經驗亦顯示，加州樓價曾經大跌三至五成，歷史係有機會重演。」
大行又點睇呢？美林警告，按揭公司如果收緊信貸標準，今年美國樓價平均會跌一成；假如聯儲局未能及時減息，美國經濟「幾乎百分百」會陷入衰退。