以女子組合Twins出道的蔡卓妍，入行16年累積逾億身家，惟感情路卻屢受挫折，10年跟鄭中基離婚，之後與師弟陳偉霆譜女尊男卑戀，惟5年後隨陳偉霆在內地彈起分手，感情空窗了兩年的阿Sa終覓得新歡，戀上連詩雅有米舊愛、「百億麻雀館太子爺」石恆聰。

個人擁逾億物業的Anthony是城中筍盤，與圈中小富婆阿Sa十分合襯，有消息指兩人由好友馬天佑和何超蓮牽紅線，拍拖短短兩個月，感情已一日千里，阿Sa更成功融入男友家中，日前有雜誌影到阿Sa收工後奔向男友，連續兩晚到Anthony的3億豪宅度春宵，愛得黐纏，早上離去時獲男友派人護駕，Anthony更匿在門邊幫忙睇水，夠晒體貼。

不過，有傳Anthony的舊愛連詩雅不肯放手，一直死纏求復合，甚至向Anthony妹妹埋手，希望對方能幫自己講好說話，惟Anthony卻嫌連詩雅喜愛夜蒲，身邊不時有男性友人，加上石媽媽覺得阿Sa沒明星架子又不貪錢，全家都投阿Sa一票，現年34歲的阿Sa成功鍊贏細自己6年的連詩雅，身在佛山的阿Sa昨以短訊認愛：「o依家好開心，多謝大家關心！」

至於輸家連詩雅今日踏入29歲，卻收到這份「禮物」贈慶！昨晚她到中環出席手機發佈會，明顯有備而來說：「我哋都分開咁耐，佢同任何人一齊，都唔係好關我事。」問到分手多久？她說：「已經唔記得。」對於傳她求復合，連詩雅否認：「呢啲係虛構報道，得啖笑，呢刻自己好開心，公司同事仲話我係筍盤㖭。」

對於舊愛跟阿Sa拍拖會否祝福？連詩雅說：「梗係祝福啦，大家都認識咗咁多年，將來佢做乜都祝福。」問到是否還愛Anthony？連詩雅停頓兩秒猶疑說：「點講呢？朋友囉，好少搵嘅朋友。」問覺得Anthony和阿Sa合襯嗎？她說：「靚仔靚女梗係襯。」有否酸溜溜感覺？她割席說：「關於佢嘅嘢都冇乜感覺。」至於生日願望，她笑說：「睇吓有冇艷遇。」另對於跟舊唱片公司華納的合約糾紛，她表示交經理人公司處理。

同場的馬天佑則否認是紅娘：「冇冇冇，呢個字咁娘，我冇特別做紅娘，只係一齊食飯。我係一個好重友情嘅人，阿Sa開心我就開心，佢係好女仔，值得有幸福。」