韓國近日發生名人被踢爆虛報學歷風波，呢宗新聞唔單止涉及當地政界同教育界，最近好多藝人都惹嚟「造假」疑雲。曾拍攝韓劇《那夏天的颱風》嘅49歲女星張美姬，同埋44歲男星崔秀鍾都先後承認自己嘅大學學歷唔係真嘅，最近連喺名牌首爾大學服裝系畢業嘅金泰希都被網友同傳媒懷疑。
呢單虛報學歷嘅新聞喺中國內地引起好大迴響，金泰希仲被拉埋落水，日前《朝鮮日報》引述番內地報章，指金泰希喺04年韓劇《哈佛愛情故事》嘅英文麻麻哋，令人質疑佢有可能唔係大學畢業生，頓時令希妹嘅學歷之謎成為韓國同內地嘅焦點。

Fans聲援

討論網站「韓劇社區」嘅網友對呢件事議論紛紛，說話激啲嘅網友話好多韓國明星都整容，以「假臉」示人，又鍾意炫耀學歷，所以有啲明星包括金泰希虛報假學歷冇乜出奇喎。
雖然係咁，但仍有好多網友聲援希妹，畢竟佢05年行畢業禮時，都廣邀傳媒出席，應該冇花假嘅。網友domotoakane話：「日韓藝人除非在外地很長時間，不然英文都相當蹩腳，學歷再高也沒用。」whbkitty都話：「不能從這點就說人家造假。」不過，呢件事令韓國藝人重視番自己言論嘅確實性，都未嘗唔係好事。

討論區
網址： http://www.kdocn.com/bbs/thread-247048-1-1.html

版主：阿Net
本欄逢周一至五刊出