從歐錦棠身上，你總會看到一種幾近失傳的「武士道精神」，通過克己、堅持、奮鬥去贏取別人尊重。從影超過二十年的他，見證香港電影由盛轉衰，儘管如此，他仍默默為港片付出，每每出現在本土電影之中，擔當舉足輕重的綠葉角色。「我係香港人嚟o架嘛，梗係要拍番本土電影啦！」本身是超級李小龍迷，又因為由細睇港產片大，一個個震撼畫面留在腦海纏繞不去，令棠哥找不到理由不堅持做電影：「何況自己身為從業員，更加有責任承傳落去。」

棠哥與妻子萬斯敏幾年前創立了劇道場，劇場越搞越大，佔用的時間也越來越多。但無論如何，棠哥總會花時間放在電影上：「你叫我揀劇場或者電影，對唔住，我真係揀唔落，兩樣都係咁鍾意。慶幸啦，keep住都有製作，（製作人）會搵我參與電影。」作為電影演員，棠哥可以盡情享受演戲樂趣，事關只需好好鑽研角色，其他一切可交給導演處理。相反，劇場則要將全副精力放在製作，作品就如同親生骨肉，享受的是另類滿足。問到會否重拾導筒，棠哥說：「呢個夢係冇放棄過，自從99年嘅《1959某日某》，我創作嗰團火係冇熄過。亦因為咁，呢幾年製作咗咁多舞台作品出嚟，裏面有好多內容係可以成為電影題材，亦都同電影人傾過。睇時機啦，適當時機呢啲事情就會醞釀，就會發生。」

時機當然重要，然而近年棠哥聽過最多而又最打擊士氣的話，便是這句：「仲拍電影？做電影蝕死你呀！你香港賺得幾多呀？」也有老闆劈頭一句便問：「返唔返到大陸？珠三角都好吖！」難免令創作人心灰意冷。棠哥說：「在商言商無錯，不過就係因為咁，有好多地域或者政治問題，扼殺咗好多創意。」雖曾意興闌珊地說過本土電影業「一潭死水」，今日卻有另一番體會：「我睇到有盼望，我見到好多類型電影可以出品，又有好多新晉嘅創作人、導演，有好多新概念出嚟。」

循例問棠哥怎看未來十年香港電影的境況，他笑說：「好敏感o架喎講『十年』！我真係唔敢預測，社會已經太被動，我哋都唔敢預測兩年後香港變成點。因為香港格局一旦變咗，好多藝術創作，未必一定話叫受局限或箝制，但你睇唔到個創意有幾大。」

採訪：馮國康、Sapna
攝錄：廖達燊
剪接：Stewood

全港打工仔特約：Lun廚動腦Q
加開1:30pm
3月11至22日
星期一至五1:30pm 10:30pm
http://bit.ly/2VKESPM

《Captain Marvel》完全導讀本
足料78頁 深度解構最強英雄！
https://bit.ly/2VyXIt2

第二屆最港電影大獎投票網址
https://bit.ly/thekongestfilmawards2018